martes, 16 de junio de 2015

Dous libros magníficos






O pasado día once de xuño deuse a coincidencia de que se presentaran ao público dous libros excelentes na cidade da Coruña. O azar, ou destino, ten, ás veces, estas ocurrencias.

Na Fundacion Luis Seoane celebrouse un acto, brillante e multitudinario, para presentar o libro-disco “Cadros dunha exposición” (Kalandraka), do que son autores José Antonio Abad (texto) e Xosé Cobas (ilustracións); o quinteto de metais Hércules Brass fixo unha extraordinaria actuación, interpretando pezas de Mussorgsky. O acto foi unha auténtica celebración de música e literatura e o numeroso público asistente ficou entusiasmado. 

José Antonio Abad, psicólogo e pedagogo, adica a súa xubilación a escribir “contos con música” para nenos e non tan nenos. O meu amigo Xosé Cobas é un dos mellores ilustradores do país, e así o ten demostrado en máis dun centenar de libros que contan co seu luminoso traballo de ilustración. Este libro, que teño agora enriba da mesa, é unha auténtica xoia, unha obra de arte na que Cobas demostra a súa extraordinaria mestría, que o fixo merecedor de numerosos premios nacionais e internacionais. 

 
Ese mesmo día, e á mesma hora, presentouse, na libraría Lume, unha antoloxía de poemas de sempre , “Los poemas que no puedes dejar de conocer”, realizada polo profesor José A. Ponte Far, que reúne obras da poesía castelá, hispanoamericana e galega. Houbo un recital poético no que participaron, entre outros, os grandes poetas Xulio Valcárcel e Miguel Anxo Fernán Vello. Foi un acto máis íntimo, pero cunha grande altura literaria. Se o primeiro libro é unha obra de arte en sí mesmo, este outro (con ilustracións de Perico Castro), máis modesto na súa presentación, é a obra dun sabio. 

Porque hai que saber moito de poesía e ter unha gran capacidade didáctica para realizar esta selecta recopilación que quere servir para que os que non son lectores habituais de poesía cheguen a coñecela e disfrutala. O autor lembrou como, na súa adolescencia, comezou a amar a poesía coa lectura de “Las cien mejores poesías de la lengua castellana” de don Marcelino Menéndez Pelayo, na biblioteca do casino de Negreira, mentres o seu primo xogaba ás cartas. Esa é a vocación deste libro: achegar a poesía ao maior número posible de lectores.

Ponte Far é catedrático de Lingua castelán e Literatura e ten unha longa traxectoria como profesor, agora xubilado. A selección que presenta, ainda que respecta os criterios estéticos estabelecidos polo bo gusto literario, responde, en definitiva, ás súas preferencias persoais. O libro vai “desde Gonzalo de Berceo ata Miguel d´Ors, desde Rosalía a Xulio Valcárcel, desde sor Inés de la Cruz a Mario Benedetti”. Coincido co autor en que este libro debería estar nas escolas e  nos institutos, e tamén nas bibliotecas públicas e en todas as casas, para fomentar o pracer da lectura e o gusto pola poesía.


Recomendo con entusiasmo estes dous volumes aos amantes dos libros e da literatura, por dúas razóns: porque son dúas obras excelentes, que paga a pena ler e gardar para o futuro. E tamén porque os dous autores (Xosé Cobas e Ponte Far) son amigos meus e conveciños das terras de Barcala. Tamén é casualidade, ou cousa do destino, que dous veciños da mesma parroquia de Logrosa (Negreira) viñeran presentar na Coruña dous libros, magníficos, o mesmo día e á mesma hora! Coa cantidade de días que ten o ano!


Perico Castro, Xulio L. Valcárcel, José A. Ponte Far, Pablo Vaamonde, Miguel Anxo Fernán Vello







2 comentarios:

  1. José A. Ponte Far17 de junio de 2015, 0:45

    Gracias, Pablo, polos eloxios que me correponden polo meu libro. Pero creo que aquí o que realmente é unha obra de arte é o de Cobas e Abad. O meu é unha modesta invitación a entrar na poesía. Si o conseguira con moita xente nova, entonces sí sería importante.
    Unha aperta forte, paisana e veciñal.
    Pepe Ponte

    ResponderEliminar
  2. Moitas grazas, Sr. Vaamonde, por acompañarnos na presentación de "Cadros dunha exposición". E ao Sr. Ponte pola súa xentileza.
    Aproveitamos a ocasión para facer partícipe o autor desta bitácora dunha pequena crónica gráfica do acto celebrado na Fundación Luís Seoane:
    http://www.kalandraka.com/blog/2015/06/12/presentacion-de-cadros-dunha-exposicion-na-coruna-2/

    E para quen non tivera ocasión de escoitar as magníficas intervencións de José Antonio Abad e Xosé Cobas, ás que se sumou a non menos brillante introdución do escritor Xabier P. Docampo, velaquí unha entrevista cos autores, en Radio3 (a partir do minuto 34):
    http://www.rtve.es/alacarta/audios/la-hora-del-bocadillo/hora-del-bocadillo-vigilia-santi-arcas-cuadros-para-exposicion-13-06-15/3169024/

    Saúdos cordiais dende Kalandraka Editora.

    ResponderEliminar